A·doko ge 38 Eklavya Model Residential School (EMRS) rangoni EGH a·jani Samanda aro Ribhoi a·jani Pahamsyiem songrango skulni rika cho·ani kamrangko matchotaha ine Education Minister Rakkam Sangma aganangaha. Skulo skigipani kamrangnaba porikkako seatmanaha jekon National Entrance Screening Test (NEST) ni kamrango rimnapna ge·etataniko senge dongkuenga ine u·iatangan baksana ia matchotgimin skulrangko re·baenggipa April jani 1 tarikoni a·bachengatna sorkari miksongenga ine Education Minister Rakkam Sangma parakangaha.
Iani bidingo 2022 bilsio India a·songo block ge·antion EMRS skul ge·prak dongna nanganiko parakmanahaoba maina Meghalaya a·doko ge·sa skulkomangba a·bachengna man·kujaenga ine Mawlai ni MLA Brightstarwell Marbaniang sing·angaha.
Marbaniangni sing·anina, EMRS skulrangko rikna bilsi 4 ba bilsi 5 rangon chamatahaoba dingtang dingtang a·selrang jekai Covid sabisi aro bang·a blockrango a·arangni bidingo neng·nikanirangko man·angaha ine Sangma aganchakangaha. Indake ong·genchimoba changni chang tom·e chanchirimaniko dake, bang·a skulrangni matchotanganiko niknagita man·enga aro man·a dipet ta·rake matchotate a·bachengatna ka·dongsoenga ine Sangma aganangaha.
