Assembly Budget Session ni gittamgipa salo, Baljek Airport ko da∙ona kingkingba chalaina man∙kujaengani gimin TMC ni dilgiparangoni Miani D. Shira aro Charles Pyngrope sing∙doaniko dakangaha. Re∙anggipa 2013 bilsio rikanggipa sorkari 50 acre mangni a∙arangko man∙dapgenchimoba chu∙gimik nangagita man∙kujani gimin ia Airport ko bimang ong∙atna man∙kujaenga ine uamangni sing∙anina Deputy Chief Minister aro Transport Minister Sniawbhalang Dhar aganchakangaha. Unbaksana ia Airport ko name dake bimang ong∙atnagita, da∙o 68 acre mangni a∙arangko nangdapkuenga aro iani bidingo sorkari kamrangko a∙bachengatangaha ine DY CM agandapangaha.
Ia nangdapgipa a∙arangko ba land acquisition nigita kamrangko matchotatani ja∙manosa DPR rangko Airports Authority of India (AAI) na watate rika cho∙anirangko a∙bachengatna man∙gen ine Dhar aganangaha. Da∙o dipet Baljek Airport na chu∙gimik a∙a man∙giminara 120 acre nigita donga aro AAI ni dongimin niamogitade 68 acre mangni a∙arangko nangdapkuenga ine ua talatangaha. Una agreba sildorengrangko re∙chakatatna aro bilonchakatnagita chu∙gimik 1750 metre rangko nanga jeon da∙ona kingking 1100 metre rangni gitasan a·arangko man·kuenga ineba agandapangaha. Ia chu∙gimik a∙arangko man∙ani ja∙manosa ma∙mong sorkarini UDAN scheme aro AAI nigita tangka paisarangko chamataniko man∙e rika cho∙anirangko a∙bachengatna sorkari chanchisamsoenga ine bon∙kame u∙iatangaha.
