Da∙ororo India aro Bangladesh-ni sima ari jolo mongmarangko chagronge janggirangko gimaatna nangao ga∙akaoni naljoke dongna man·agita Aaranyak dolrang Forest Department-rangko okame mongmarangni bewalko ma·sie ra·na man∙agita awareness programrangko ong∙atangenga. Ia awareness programo mongmarang baksa nangrikaoni naljokna man∙agita pilak dakna nanggni kamrangni bidingo Aaranyak dolrang skie on∙aniko dakangenga.
Apsan daken re∙anggipa 16 tarikoba ia programko Aaranyak dolni u∙i ma·sigipa manderang South Garo Hills ni Mahadeo jolni BSF 1st Battalion aro Forest department ni manderangna skie on·angaha. Aaranyak ni official Abhijit Boruah mongmako chagrongo dakna nanggni kamrangko aro uarangni bewalrangni bidingo agantalatangaha. Una agreba Aaranyak ni official Anushka Saikia mongmarang baksa nangrikaoni naljokna man·ani cholrangni bidingo aganangskaaha. Apsan daken Aaranyak ni Rupam Goyari dingtangmancha gamchatgipa dakchakanirangko on·angskaaha.
Ia awareness program o BSF Battalion ni Deputy Commandant Sanjay Singh baksana sak 35 sipairang, Baghmara Forest Range ni Officer Chinchin Sangma aro Siju Wildlife Sanctuary ni Officer in-charge Skilson D. Marak baksana sak 17 forest frontline ni ning·o kam ka·giparang dongpae bakko ra·angtokaha.
Re∙anggipa January-ni 22 tariko ia apsan programko South Garo Hills a∙jani BSF ni 50th Battalion rangna ong∙atangaha aro da∙al salni bako apsan dakgipa programko BSF ni 100th Battalion West Garo Hills a∙jani Dalu o ong∙atangenga. Ia programko ong∙ataniara mande aro mongmaming nangrike janggirangko gima∙atna nangaoniko naljoke rakkina aro maming nanggrikani gri mongmarangko ripingna man∙anagita miksongani ong∙a.
