Najing Bazaar, Tura-o da∙al salni bako gitalgipa Shopping Infrastructure for Migratory Rural Vendors and Infrastructure for Parking ko a∙dokni Chief Minister Conrad Sangma mongsonggipa sokgipa ong∙e nokdonggae on∙angaha. Ia project ko Urban Affairs Department nigita jako ra∙e kam ka∙angaha jean songadamni manderangna dingtangmancha uamangni bosturangko ia gitalgipa bajaro pale sim·e cha∙nagita dakchakanggen.
Ia tom∙bimonganiona Tura ni MP Agatha Sangma, Speaker Thomas Sangma, WGH ni DC Jagdish Chelani, Urban Affairs ni Director E. Kharmalki, Ditrict Urban Planner T. K. Tiewsoh, Urban Affairs Department aro Tura Municipal Board ni officialrang bakko ra∙angaha. Unbaksana Development Committee aro wilwilao songdongenggipa manderangba re∙bae ia tom∙anio bak ra∙angtokaha.
Ia project ko namedake chu∙sokatna man∙anina Chief Minister Conrad Sangma dingtangmancha Nokma, Urban Affairs Department aro TMB o kam ka∙giparangna uni mittelpilskaaniko on∙angaha. Mikkangchi ia complex ko manderang dingtang dingtang nanganirangna nambate jakkalna man∙agita, adita biaprangko namdapatna miksonganirangkoba Sangma janapangaha. A∙chik a∙songni manderangna bading chiwalnagita indakgipa namgipa antidamrang donganichi gipin a∙songoni re∙bagipa manderang adita jatni anti cha∙ani bewalrangko nikangnagita man·anggen ineba Sangma aganangaha. Ia complex-o dokanrangko dakna on∙agita dingtangmancha Urban Affairs Department jakko ra∙e manderangna dokanrangko chamataniko dakanggen jean bang∙a manderangna namgnirangko on∙anggen ine Sangma agandapangaha.
Ia project ko ra∙gatanio manderangni bang∙a neng∙nikanirangoniko naljokatnagita, Nokma ni rakbee kam ka∙anina, Tura ni MP Agatha Sangma dingtangmancha uni mittelpilskaaniko on∙angaha. Ian manderangna bang∙a dakchakaniko ra∙baan baksana Najing Bajar mikkangchi Tura songjinmani ge∙sa mongsonggipa bading chiwalani biap ong∙na kraanikoba ua aganangaha.
