SWKH a·jani Ranikor Civil Sub-Division ni ning·o donggipa Balat jolranggita, niamgri India a·songni rasinrangko Bangladesh a·songchina salantian gari bol ritchani ritcha rama re·grikna jokpilgija dal·gipa aro chongipa garirango salrongenga ine Balat jolni GSU dolrang koborna u·iatangaha. GSU dolni parakatanigitade, salantian Bangladesh a·songchi rasin salangenggipa garirangko Pulis aro BSF melie watataniko dakenga maina indita garirang ramarango jokpilgija Balat jolo ritting ritting dake jachange dongaona sokjawachim ine rimchipa gnang janapataha.
Indake niamgri a·songni rasinrangko Bangladesh a·songchi salangani a·selo, a·doko rasinrangni dam namen tang·dororoenganiko niknagita man·enga ineba janapangaha. Indakgipa obostarangni bidingo India aro Meghalaya sorkari niamrango pangchake ta·raken raka ja·kurangko de·e niamgri rasinrangko salangenganiko dontongatna nanga ine GSU dolrang didiataha. Balat jolo rama dilsasan ong·ani gimino songre songgabatgipa manderang aro dingtang dingtang nanga kamrangna re·a doanirango jolni manderangna garirang jachange dongani a·sel namen neng·nikaniko man·enga ineba GSU dol u·iatangaha.
Meghalaya sorkari Balat jolranggita Bangladesh-chi rasin salanggipa garirangko ta·raken champengatna nanga, ong·jaode GSU nie dongjawa aro uamangni kosako raka ja·kurangko de·anggen ine mikrakatnikoba dakangjolaha.
