PA Sangma Sports Complex-ko ta∙rake oprake on∙ani jadokni ja∙mano matchotkugijagipa kam retaining wall, a∙doko mikka jimbee waani a∙sel be∙gruani gimin namen kratcha∙beani ong∙aha. Ia complex-ko December 2022-o oprake on∙ahachim aro 22 june, 2023-o be∙gruaha ine TMC aganaha.
Ia kal∙chakram biapko taria ru∙utatanian batanggimin bilsio Assembly dome ni be∙gruana bate kratchaani ong∙bata maina ian niksenggipa dilgiparangoni saksa aro a∙dokni Chief Ministerni pagipa Purno A Sangma ni bimungo tarigipa ong∙a. P A Sangmani bimungo tarigenchimoba rika cho∙aniko dakanio bosturangni nama namgijaniko name nichenggija tarianiko ian mesokaha.
Je company an ia stadiumko rikengachim uni kosako IPC aro CrPC o pangchake mokordomako ka∙na gita nanga maina bang∙a janggirangna ian kenchakaniko ra∙baaha. Rasong gnangbee darangni janggiba ia a∙sel ong∙anio gimajaha. Ia sports complex ko rikanira a∙dokni manderangna nangani gimin rikgipa ong∙ja indiba CM ni nangnikani gita rikgipasan ong∙aia maina Assembly election na skang mangmangsan ia stadiumko ta∙rakbee oprake on∙aniko dakaha ine TMC ni Vice President George B. Lyngdoh aganaha.
Ia a∙sel ong∙ani bidingo TMC chadambe dolni dilgipa Richard Marak ba MDA sorkariko matnange aganataha.
