West Garo Hills a·jani Tikrikilla, Kamari songo Megh Farm Processing Hub aro Prime Hub ko da·al salni bako a·dokni Chief Minister Dr. Conrad K. Sangma oprake on·angaha. Ia Hub rangko a·bachengate on·anichi game ge·e cha·enggipa manderangni je ge·e man·gimin jekai Komila, Anaros, Te·brong ba gipin Garo Hills o namgipa bolam biterangko indin soate galaigija cold storage ba ka·singipa biapo done dingtang dingtang cha·ani ringani bosturangko tarinagita dakchakanggen. Uasan ong·aigija indakgipa processing hub rang donganichi game ge·e cha·giparangni man·gnirangko tang·doatnagitaba dakchakani ong·anggen. Ia hub rangko a·dok sorkari rika cho·anirango dakchakangaha jekon da·o Muktidata Multipurpose Co-operative Society, Kamari jako ra·e chalaiangskagen.
Ia gitalgipa Hub rangko oprake on·ani somoio Chief Minister Dr. Conrad Sangma mongsonggipa ong·e sokbaa baksana Turani MP Agatha K. Sangma, Power Minister AT Mondal, Salmanpara ni MLA Ian Botham Sangma, Raksamgre ni MLA Limison Sangma, Tikrikilla ni MLA Jimmy Sangma, Selsella ni MLA Arbinstone Marak, Mahendraganj ni MLA Sanjay Sangma, West Garo Hills ni Deputy Commissioner Jagdish Chelani, NCDC ni Regional Director Robert Touthang aro Gain India Ltd. ni Chief Manager N Haokip ba re·bae bakko ra·angaha.
Garo Hills o bang·a bolam biterang gnanggenchimoba uarangko ripinge done dingtang dingtang cha·ani ringani bosturangko tarinagita biaprang dongjani a·selo biterangni soe gimaani ong·aniko niknagita man∙enga. Indake a·doko game cha·giparangni neng·nikanirangoniko naljokatna aro uamangko ra·donagita tarichakram biaprangko kulie pale sim·e cha·ani gadangona sokatna a·dok sorkarinigita dakchakenga ine Chief Minister Dr. Conrad Sangma aganangaha. Unbaksana a·doko game cha·ani a·bao chu·gimik tang·doatna ge 50 MeghFarm Processing hub aro Prime Hub rangko ra·bana miksonganiko Sangma parakangaha.
Ia programni bako Muktidata Multipurpose Co-operative Society ni ning·o nambate kam ka·gipa member rangna award ba boksisrangkoba on·angjolaha. Co-operative o nambatgipa ong·e award ko man·gipa member rangara Wilna N. Marak, Kama M. Sangma, Nelco Sangma, Robinson Marak aro Theresa M. Sangma ong·a. Una agreba gamgipa ge·giparangoni nambatgiparangara Kiran Ch. Sangma, Wenmon A. Sangma aro Nangson A. Sangma awardrangko man·angskaaha. Una agreba FOCUS, YESS Meghalaya, PES, MSRLS ni ning·o CLF aro VO rangna gong 1.23 crore tangkarangni cheque rangkoba sualangjolaha.
