A∙doko do∙oni sabisi giproroenga ine manderangni do∙o be∙en ko cha∙na kenani gimin All Meghalaya Poultry Supplier and Retailer Association, do∙orango sabisi rangko man∙jaenga aro be∙en rangko cha∙na maming kenchakani dongja ine jinmana parakataha.
Kobor ra∙timgiparang baksa agangrikani somoio Association ni President B Kharchandi, do∙o be∙enko cha∙anichi manderang sa∙aniko man∙enga ine photo aro agananirang social media rango giproroenga niko kakket ong∙ja ine aganataha.
Veterinary department baksaba uamang agangrikaniko dakaha aro department-ni gitaba do∙orango maming sabisi man∙anirang dongja ine u∙iataniko on∙aha. Indiba a∙doko do∙o be∙enrangni dam tang∙doani a∙selara West Bengal oniko ra∙baengmiting somoio Assam a∙dok gita ra∙bana nangani gimin adita neng∙nikanirangko man∙engani a∙selsa ong∙a ine ua agandapangaha.
