A∙doko MDA sorkari 2018 bilsioni a·dokko chalaiaoni da∙ona kingking rama jal·angrangko rika cho∙anio gong hajal 10 crore na batpile tangka paisarangko jakkalangaha ine Deputy Chief Minister aro PWD ni In-Charge Prestone Tynsong kobor ra·timgiparangna parakataha. A∙doko ramarangko tarianio namgija tarie on∙enga ine matnanganina aganchakengon, pilak rika cho∙aniko dakenggipa engineer rangko ramarangko tarianio name tarie on∙chinagita ge∙etmanaha ine Tynsong aganangaha.
Songadamrango ramarangni nosto ong∙e dongengani aro tarigija galchipe don∙enggiparangni bidingo sing·anina, batanggimin somoirangonin bang·a ramarangkon tarigija galchipgiminrang dongani a∙selo pilak kamrangko rang·san matchotatnagita man·ja ine Tynsong aganangskaaha.
Ia somoini bako a∙dokni ning·o pilak Pradhan Mantri Gram Sadak Yojna (PMGSY) ni bidingo nirok sandianiko daknagita ua tom∙e chanchirimaniko dakdilangenga aro ma∙mong sorkarinigita pilak a∙dokrangna PMGSY 1 aro PMGSY 2 nigita ramarangko tarianio ia bilsini March jao matchotatnagita donsoaha ine Tynsong aganangaha. A∙doko PMGSY ni ramarangko rika cho∙anio somoigita matchotna kadongsoenga ine Tynsong aganangaha. Unbaksana PMGSY 3 nigita ramako tarina pilak nanga kamrangko ka∙engaha ineba ua janapangaha.
PMGSY 3 ni kamko ka∙anio rama jal·ang donggijagipa songrangona ramarangko sokatna aro dongsogimin ramarangko taridapanggen jean 1250 km mangnigita ong·gen ine Tynsong parakataha. Una agreba PMGSY 1 aro PMGSY 2 nigita ramarangko tarianio 2003 ni census osa pangchake kamrangko ka∙ahani gimin badita ro·e tariahachim, uarangni bidingo tale aganagita man·jaha ine Tynsong aganangaha.
