Adita somoirangna skang UGC nigita SC, ST aro OBC rangna a·kanggiminrango chu·ongagita manderang gapjagenchimode ua biapko unreserved dakatskana niamrangko ra·gatanina AHAM-CEB H.Q Tura ni President Georgeprince Ch. Momin iani bidingo nirokatchinagita Chief Minister Conrad Sangma-na chitti sedoataha.
India a·songni tarigimin niamrangko niatgenchimode, reservation policy o ja·manchakgipa aro dakchakaniko nangbatgipa ST, SC aro OBC rang ong·a jean reservation policy nigita sorkariniko poraia skiani bidingo aro kamrang dingtang mancha tikatani bidingo dakchakaniko man·enganiko ra·gale gimikna tikatode neng·nikaniko chagronggen ine janapataha. Unreserved category ni pal dingtangmancha maini a·sel reserved candidate rang chu·soknagita man·jaenga ja·pang ja·dil ko name am·sandie kam ka·na nanga ine Momin chittio janapataha.
UGC ni ra·gatgimin niamo chubatgipa poraiani gadango aro pilak manderangko apsan ra·banagita miksonganiko maini gimin reservation policy donggenchimoba ia ge·gittam category na tarigimin niamna neng·nikani ong·enga ine Momin sing·doangaha. Iani bidingo politics ko mikkango dongija nambate aro ning·tue chanchina nangao ga·akenga maina dereserve ka·ahaode a·kanggimin caste-o ga·akgiparangna kamrangko tikatna man·jawa aro ST, SC aro OBC rangko kamo bang·e rimnapjawa jeon kajia golmalona sokatgen ine momin janapangaha. Iarangsan ong·aigija indake a·kanggimin jatrangko changalaniko nikna man·an baksana, politics nigitaba kamrango rimnapnagitaba altubee man·anggen ineba Momin janapataha.
Ia chu·gimik obostarangko nigrike AHAM dolrang CM ko ma·mong sorkari aro UGC baksa agangrike ST, SC aro OBC rangna mikkangchi nambata ja·kuko de·angchina aro pilak niamrangko ra·gatna skang name dake chanchirime kamko ka·angchinaba didiataha.
