Da·al salni bako Demdema Community aro Rural Development Block ni Rongadatgre songo PMKSY-WDC- 2.0 GIMI Watershed ko Tura ni MP Agatha K. Sangma oprake on·angaha. Ia oprake on∙ani somoio Soil & Water Conservation ni Minister Marcuise N. Marak, Department ni officialrang aro jolni manderang dongpae bakko ra∙angtokaha.
Ia programo dingtang dingtang scheme rangni gamchataniko aro a·dokni bang∙a bakrango ra∙gatgimin kamrangara, manderangni economy ko ra∙donagita ong·a. Una agreba ge∙a gamanio neng∙nikanirangko namedake nikrokna aro a·dokni ge∙a gamaniko ripingnagita Sangma agantalatangaha. PMKSY ge∙sa ma·mong sorkarini scheme ong·an baksana a·dokni ge∙a gamanirangko aro salantio kam ka·anirangko ripingnagita manderangna tangka paisanigita koros ka∙gimin ong·a.
Ia projectna DOLR, MoRD aro ma·mong sorkarini Soil aro Water Conservation Department nigita tangka paisarangko chamatgimin ong·an baksana a·doko mikka wa·a tik ong·gijani aro chirangko ripingnagita miksonge dakani ong·a. Indakgipa projectrangko ra∙baaniara, songadamrango ge∙a gamani a·bao tang∙doatna man·gen ine janapangaha. Una agreba Chief Minister Conrad Sangma ni dilanichi re∙baenggipa 2028 bilsio gong 10 crore mangnigita ra∙dona miksonge ja∙kurangko de·angenga ine Soil & Water Conservation ni Minister Marcuise N. Marak aganangaha. Unbaksana ia programo Tura ni MP ua jolni adita Self Help Group rangna cheque rangkoba su·alangjolaha.
