Mijal salni bako ministry of Development of the North Eastern Region (DoNER) nigita South West Garo Hills Ampati-ona, ma·mong sorkari ni scheme rangko jakkalani bidingo niroknagita Union Minister of State for Finance Dr. Bhagwat Kishanrao Karad re·baaha. Dr. Karad baksa Tura ni MP Agatha Sangma, Rangsakonani MLA Subir M. Marak, Deputy Commissioner R. P Marak aro Superintendent of Police Vikash Kumar re·chape dam gittam biaprangko nirokeaniko dakangaha.
Ampati Circuit House ni Conference Hall o ADC Dr. Rezina Ch. Marak aro gipin departmentni officerrang, ma·mong sorkari ba Prime Minister Narendra Modi ni on·gimin schemerangko maikai jakkalenga aro kam ka·anio neng·nikanirangko cha·grongengani bidingo Dr. Karad na parakangaha. Scheme ni bidingo pilak katta ba parakanirangko knae Dr. Karad an·tangni kusi ong·aniko parakangskaaha. A·doko tangka paisarangnigita nen·gnikanirangko chagrongaoni naljokna man·agita, Dr. Karad bank branchrangko kulinagita Chief Minister Conrad Sangma baksa agangolpogrikanikoba janapangaha.
Sanna bannani a·bao samrangko on·anio, an·o donggipa ma·giparangko porikka ra·e nianiko aro sanram biapo bi·sa an·pakaniko bariatna ba namdapatan baksana a·no donggipa ma·giparangko Pradhan Mantri Matru Vandana Yojana o bimung segate tangka paisanigita dakchakani ba namgnirangko man·agita didiangaha. A·sel ong·ani somoio namgniko man·a amnagitaba Pradhan Mantri Suraksha Bima Yojana ni bidingo manderangna u·iate on·chinagitaba Dr. Karad didiangaha. A·jao Jal Jeevan Mission kamrang namrorobaenganiko nike kusi ong·aniko parakangan baksana Mantri Gramin Awaas Yojana ko manderangna u·iatchinaba dindiangaha.
A·doko bidani a·bao tang·doatnagita Eklavya Model Residential School ko rikenganina demittelan baksana poraigipa bi·sarangna indakgipa bang·a schoolrangko rike on·angkunagitaba Dr. Karad aganangaha. Viksit Bharat Sankalp Yatra nigita dakchakaniko man·enggipa manderang baksaba agangolpogrike ia scheme ni gimin u·iataniko on·e pilakchin gipatchinaba didiangaha.
Bon·kame Dr. Karad Ampati Civil Hospital ona re·ange doctor aro uno dangdike on·engiparangko gronge sanna bannani a·bao dakna nanggni kamrangni bidingo golprimangaha.
