Mijal salni bako Nadiad Gujarat o, U-23 me·asa dolrangni Col. CK Nayudu Trophy na cricket kal·anio, Meghalaya dolrang wicket 3 chi brigipa sal aro bon·kamgipa innings ko kal·e Mizoram dolrangko amataha.
Ia kal·anio Kevin Christopher captain ong·e ia chango nambee kal·na man·jagenchimoba 40 run rangko man·e doltangko amatna matchote kal·e on·angaha. Kevin a·dokna changgittam kal·anio, changgni century rangko man·e chu·gimik 423 run rangko man·e a·songo brigipani gadango ong·e dongenga.
Meghalaya dolrang changgittam kal·anio chegipa ong·e 19 point rangko man·e Nagaland dolrang baksa apsangrik ong·e dongenga. Meghalaya dolrang a·dokona re·bapile January 28 tarik oni Arunachal Pradesh baksa kal·angskagen.
