NEHU, Tura Campusni Garo Department nigita mijal salni bako Alumni Meet 2024 ko NEHU, Tura Campuso ong·atangaha. NEHU, Tura Campus ni Head Department of Garo Dr. Jacqueline R. Marak, batanggimin bilsi 1996 oni 2023-ona, poraianggiparangko chatro chatrirangko niksoe uni kusi ong·aniko parakan baksana uamangni kamtangtango name ka·angenganina mittelpilangaha.
NEHU, Tura Campus aro Tura ICFAI University ni Retd. Pro-Vice-Chancellor Prof. Milton S. Sangma mongsonggipa ong·e sokbae, Departmento poraianggiparang dingtang dingtang universityrang, collegerang, skulrang aro officerango dangdike songsalko namroro-silroroatenganina katchaaniko parakangaha. Unbaksana mikkangchi Alumni Association ni kam ka·anio NEHU, Tura Campus aro Universityna tom·tomani aro silroroaniko ra·bachinaba Sangma ku·pattiangaha.
Una agreba Caroline R. Marakni ki·tap “Longinus Sublimeni Gimin” aro Alumni ni sechimonggipa ki·tap “Sechokchim” ko Milton Sangmani jakchin oprake on·angjolaha. Mande ra·e okamaniko man·gipa, Prof. Caroline R. Marak, Retd. Head, Department of Garo, NEHU, Tura Campus, Departmento poraianggiparangko kamtangtango chubate aro bimchipe dangdike on·angchinagita didiangaha.
Ia tom·aniona sak 70 na bate Garo Departmentni alumni rang sokbae bakko ra·e, skigiparangni bimchipe dangdike on·ahanina mittelpilangskaaha. Program gimikko nambee chu·sokatan baksana mikkangchi dakna nanggnirangni bidingo chanchirime tom·aniko matchotatangaha.
