Meghalaya a·dokko man·chengaoni bilsi 52 ong·ani jaman da·al salni bako State Anthem ba a∙dokni gitko cabinet bon∙kame rachakangaha. Meghalaya a∙dokna dingtang mancha tarigipa gitko knal salo Turao Meghalaya Day ko maniani bako oprakanggen ine skotong Minister Conrad K. Sangma parakangaha.
Ian namen rasong chabeani aro katchabeani ong·a maina Meghalaya a·dok batanggimin bilsi 52 na kingking a∙doktangni git donggija ong·baenga ine Conrad Sangma aganangaha. Ia gitko tarianio bimchipe kam ka·giparangko aro knatobegipa surrang baksa nambegipa rittingrangko seanina Art & Culture department, unbaksana sakanti gitko tarianio bak dongpagiparangko Sangma mittelangaha.
