Re∙anggipa January jani 13 tariko ka∙saninggija so∙ota man∙gipa Udoi M. Sangmana A∙chik Holistic Awakening Movement (AHAM) Kharkutta Regional Unit kakket bichalko am∙an baksana ka∙limpaaniko on∙ataha. Sianggipa mande West Khasi Hills a∙jani Challang Rongkugre songoni Koreng D. Marak ni depante ong∙a. Ia obostara uni jakkalgipa gario songreangmiting somoio ong∙aha jekon ua manderangko gate salnaba jakkala ine koborna parakataha.
January 13 tariko ua ma∙sina man∙gijagipa manderangni songrena tik ka∙ako man∙e ong∙katangaonin nokchina pil·bapiljaha ine parakataha. Uni re∙bapilgijako nike ma∙drang maharirang uko wilwila biaprangoniko sandina jotton ka∙on bon∙kamao sianggipani manggisiko Kharkutta C&RD block-ni ning∙o donggipa Mendima Forest Reserve-oniko, Sangmako ka∙saninggija dake gittokko ra∙sote so∙ote galako man∙eskae Kharkutta PS na kobor on∙e donaha.
Sangma saksa kamaie nokdangko chalaienggipa ong∙ani gimin District Administration aro Meghalaya sorkariko Relief & Rehabilitation Branch of Revenue Department ni dongimin niamrango pangchake sianggipa mandeni nokdangna ex-gratia-ko on∙e dakchakaniko pakwatchina AHAM dolrang didiataha. Iasan ong∙aigija sianggipa mandeni nokdangna kakket bichalko ra∙bae on∙china aro dosi dakgiparangko sandina raka ja∙kuko de∙china didiangaha. Unbaksana changgipino indakgipa a∙selrang ong∙jachinagita Kharkutta PS oni nisokgijagipa biaprang dongani gimin Operation Group Camp (OGC) ba Aide-DE-CAMP ko ra∙bae on∙china sorkariko mol∙molatjolaha.
