Da∙al salni me∙asa aro me∙chik dolrangni badminton kal∙susanio East Khasi Hills (EKH) chu∙gimik ge 4 gold medal rangko man∙angtaiaha. Me∙chik dolrangni saksagrik kal∙anio EKH ni Netaniya T Tariang, West Khasi Hills ni Shimtihum Lyngdoh baksa susaanio chegipa ong∙e gold medal ko man∙angaha. Sirikgiparangoni WKH ni Shimtihum Lyngdoh silver ko man∙e, bronze medal rangko West Jaintia Hills (WJH) aro West Garo Hills (WGH) man∙angskaaha.
Me∙chik dolrangni sakgnigrik kal∙anio Netaniya, Caralinda Nongbri baksa bakrime Shimtihum aro Doreenzia Kharbani ko amatskaaha. Bronze medalrangko WGH aro WJH man∙angskaaha.
Me∙asa dolrangni saksagrik kal∙anio Reynel Kharbuki uni apsan a∙jani (EKH) Stephan Marwein baksa susaanio chegipa ong∙angaha. Stephan Marwein silver ko man∙e, bronze medal rangko Eastern West Khasi Hills (EWKH) aro Ribhoi man∙angskaaha.
Me∙asa dolrangni sakgnigrik final kal∙susaanio Reynel, Pratham Majumdar baksa bakrime Banshabor Lamare aro Lechan Suchiang ko amataha. Bronze medalrangko Ribhoi aro WGH man∙angskaaha.
