Garo Student Union, Eastern Zone ni President Saljrang Tengrik R Marak, Williamnagar District Commissioner officeo, sorkarini songe on∙gipa Public Facilitation Centre (PFC) o ka∙enggipa mande saksani, dingtang dingtang lekka ba certificate rangko tarina re∙baenggipa songni manderangko kattako simsakgija aganana aro an∙tangni kamko name ka∙jaengani gimin, budbar salo Deputy Commissioner na chitti sedoate badi ka∙angaha.
Uni chittio janapatani gitade PFC o internet aro technical ni neng∙nikaniko man∙e chel∙begipa songrangoni koros bon∙e lekkarangko tarina re∙bagenchimoba jakari re∙angpilna nanganiona sokronga aro basakobade PFC o ka∙enggipa songni manderangko sepangbatgipa Customer Service Centre (CSC) rangona re∙ange certificate rangko tarichinasa watatronga. Indiba CSC rango Caste Certificate ko tarina gita tangka gong 300 ba 500 dake ra∙ani a∙selo songni manderang gimikande tarina chol ong∙paja ine neng∙nikanirangko parakatronga.
Songo dongenggipa manderangni ia pilak neng∙nikanirangko janapatani ja∙mano GSU ni President, PFC o kam ka∙enggipa mande ni kosako nanga gita bichalko dakchina mol∙mole East Garo Hills a∙jani DC na chitti sedoataha.
