Chang 5 gipa Meghalaya Games 2024 na tarisamsoanirangko namen daksoe bak ra·nagiparang 14 tarik Robibar pringo Turaona sokbatokaha. Kal·susaanio bak ra·nagiparangko Meghalaya State Olympic Association (MSOA), West Garo Hillsni District administration baksa ISBT, Turao mande ra·bee rimchaksoaniko dakaha. Ia kal·susaanirangko anti gimikna ong·atanggen Jean 15 oni 20 tarikona ong·gen.
Ia manianiko Garo Hillsni gisepo ian skanggipa changna ong·atenga aro President Droupadi Murmu kal·susaanirangko PA Sangma Stadium, Turao oprake on·angnasienga. Ian gisik ra·begnigipa maniani ong·nasienga aro bang·a bannerrang aro posterrangko songe on·a manianiko nichaksoaniko nikna gita man·enga.
Rimchaksoaniko dakani somoio, Meghalaya Grassroot Music Projectni bang·a dokgipa-dam·gipa aro git ring·giparang kal·susagiparangna an·saoataniko on·e re·baenggipa salrango nambate dakchina didianiko on·angaha. Da·al attamo, kal·susagiparang PA Sangma Stadiumo tom·dake knalo kal·susaaniko oprakanio an·tangtangni kal·suasaanina tarisamsoaniko dakaha.
A·dokni pilak a·jarangoni sak 3000 mang kal·susagiparang Turani dam-16 dingtang dingtang biaprango ming-23 kal·susaanirango susaanirangko dakanggen. 2022 bilsiko nipilate nion, dingtang dingtang neng·nikanirangko man·genchimoba, sak-3000 bak ra·giparang ming-19 kal·susaanirangko Shillongni dam-13 dingtang dingtang biaprango bak ra·angna man·aha. Gimik-gimang ge 700 medalrangko uano sualangaha.
