Niamgri Bangladesh a·songoniko a·dokni dingtang dingtang sima ari jolrango ran·gimin gue biterangko badingsrukenga ine A·chik Youth Council (AYC) dolrangni namnikgijaniko parakatani ja∙mano batanggimin January 4 tariko NGH ni gitcham DC Kumari Mithali Chandra am·sandianiko daknagita ge∙etaniko on∙angaha. NGH ni DC gipin biapona kam ka·na apjitataniko man∙e a·jani ADC na ia ong·genggipa obostani bidingo nirokatna jako ra·e kam ka∙chinagita pakwatangaha ine koborna parakataha.
Ia gue biterangko Burma a∙songoni Bangladesh gita ra∙bae Dawki-Nongstoin, Shallang, Songsak-Mendipathar aro Rongjeng-Dainadubi rama gita Assam ni Matia biapona watatenga ine NGO dolrang u∙iatangaha. Ia bosturangko bree a·songni dingtang dingtang bajar antirango palan baksana ia badingsrukgipa guerangko mittam Company rangba an∙tangtangna ra∙angenga ine janapataha.
Ia badingsrukanio bol 12 ong·nasipile bostu gatgipa truck garirang donga jeon bolprako 12 metric ton mangnigita walni somoio salruraenga ine u∙iatangaha. Indakgipa niamni a∙palo kamrangko ka∙aniara sorkarina maming tangka paisa ba kajinarangko sokatjaenga ine AYC ni Secretary Maxbirth G. Momin parakataha.
