Garo Hills o ru·utbea salrangna matchotaniko senge dongenggipa Raj Bhavan ko Tura songjinmani Danakgre o da·al salni bako a·dokni Governor Phagu Chauhan virtual mode chi oprake on·angaha. Ia oprakani somoio a·dokni skotong Minister Conrad K. Sangma, Speaker Thomas A. Sangma, Tura ni MP Agatha K. Sangma, Chief Secretary D. P Wahlang, Commissioner of Division Dr. Vijay Kumar D aro a·jani DC Jagdish Chelani dongpae bakko ra·angaha.
Ia Project ko matchotatna gita gong 24.1 crore rangko jakkalangaha je biapni apalara 28.45 acre mang ong·a. Ia Project ko matchotataniara skotong songjinmakosan nirokaigija a·dok sorkarini Administrative ni kamrangna ra·bae on·ani ong·a. Ia nitobegipa biapko matchotate on·aniara a·dok sorkarini Garo Hills na mingsa chu·sokaniko mesokani ong·a ine Governor katchabeagnang parakataha.
Raj Bhavan ko a·bachengate on·aniara rikka cho·anio nambeaniko mesokgipa mingsa chin ong·an baksa manderangna rasong chabeani aro mikkangchi songjinmako tangdoatanina ku·mikchetaniko mesokani ong·a. Una agreba a·songni President Droupadi Murmu Turaona re·baani somoio ia biapo donganggen ine skotong Minister aganangaha.
A·bachengo 2009 bilsio ia buildingko Assam Type o rikna gita gong 5.48 crore rangko chamate bilsi gittam o matchotatna gita tik ka·anggenchimoba mikkangchi banggriaoni naljokna man·na gita gital dake rika cho·anirangko dakangskaaha. Indake ong·genchimoba niksamsona man·gijagipa obostarangni aro tangka paisani neng·nikani a·sel ru·utatna gita nangaha. Ia project ko tangchaatna gita 2021 bilsio Chief Minister Conrad Sangma minggni gital work order rangko bariate tangka paisani gita gong 10.98 crore aro gong 7.69 crore on·dape jako ra·e kam ka·e dongtonggija nirokanichi bilsi gittam o matchotatna gita man·aha.
Una agreba sorkari a·dokni dingtang dingtang bakrango dam 700 CM Citizen service Delivery Centre rangko rikna gita chanchisamsoenga ine janapangaha. Ia centre ko rikgenchimode a·dokni manderangna gimik dakgipa delivery service ko man·na gita am·gen aro City Centre rang baksa gital administrative ni gita rika cho·anirangchi service delivery aro a·dok sorkariko namdapatna gita am·gen.
