A·doko NCERT ki·taprangko a·bachengate jakkalna January 25 tarikona ra·doataha ine Education Minister Rakkam Sangma Budbar salo u·iatangaha. Ia ki·tap rangko Chief Minister ni somoi choljokao pangchake skanggipa Tura o sualchengate joljol Shillong oba apsan dakanggen ine Sangma aganangaha.
NCERT ni ki·taprangko January ni 16 tariko jakkalna a·bachengatnagita tik ka·genchimoba a·songni President a·dokona re·baani ong·ani gimin somoirangko ra·doatnagita nangaha. Ia kamrangko MBoSE nigita nirokaniko dakan baksana English, Maths aro Science subject rangko skanggipa taridape ra·gatna miksongenga ine Sangma parakataha. Apsan daken Social Science o ga·akgipa subject rangko name dake sandie galna nangarangko nigrike ia bilsini somoio board ni gita kamrangko ka·angskagen ine aganangaha.
Una agreba ki·taprango a·dokni bidingo se·gatna nanggipa golporangkoba expert committee jako ra·e ia 2024 bilsiko chu·gimik jakkale kamrangko ka·anggen ine Sangma parakatangaha.
