WGH Tura o 5 gipa Meghalaya Games 2024 ko oprakaniko daknagita sal chikkungna skang nangchongmotgipa tarisoanirang ba kamrangni bidingo Meghalaya State Olympic Association (MSOA) aro Games Technical Conduct Committee (GTCC) da·al salo tom·e bon·kame chanchirimaniko dakangaha. Ia tom·aniko General Secretary Finely L Pariat aro gipin Officer rang dongpaanio MSOA ni Working President John F Kharshiing dilangaha.
Ia tom·anio online gitaba Garo Hills ni MSOA aro CDMs officer rangba dongpae kal·susaani, re·a doani, dongchakani biaprang, FOP, oprakani aro bon·ataniko dakna nanggnirangko, susaani somoi aro gipin neng·nikanirangni bidingo chanchirimaniko dakangaha. Una agreba Department of Sports aro Youth Affairs ni Director Isawanda Laloo Tura songjinmani bako donggiparangko aro dingtang dingtang committee rangko ia kal·susaanina rimchaksona aro name chu·sokatna man·agita kamrangko ka·angchina u·iataniko dakangaha.
Ian bilsi 4 ni ja·man 3 gipa Meghalaya a·doko sokachaknasienggipa aro Garo Hills a·jao skanggipa changna sokachaknasigipa ong·a. Ia bilsio sak 3000 mangna batpile kal·susaanio bakko ra·nasigipa dingtang dingtang a·jarangni susagiparang sokbagen ine janapangaha. Ia program ko Torch relay ceremony ba wa·al so·e kataniko January 9 tariko Shillong songjinmaoni a·bachenge Jowai, Mairang, Nongstoin aro Williamnagar songjinmarangko napake January 15 tariko Tura songjinmao bon·atnagita chanchirimaniko dakangaha.
