Garo Hills o mingsinggipa GNLA bobil dolko warachakgipa Assam-Meghalaya cadre 2011 batch-ni IPS Officer Anand Mishra uni kamko wate election-o susanagita mangsonge tik ka·aniko parakataha. Da·o ua Assamni Lakhimpur a·jao SP ong·e jako ra·enga jeon ua kam watani chittiko Assam sorkarini Chief Secretary na on·manaha.
Mishrani chu·gimik kamko 2024 bilsini January 16 tariko dontongatgen aro uni ja·mano ua politics ni a·bao Bihar a·doko BJP party o susana tik ka·angskaenga. Ua bang·a denggu dakgipa bobil dolrangoniko warachakgipa mande ong·a jeon ua dingtang mancha Bollywood ni jawilwat ge·sa Singham ni bimingchi mingsing minggamakoba man·angaha.
Mishra uni IPS officer ong·chengaoni, West Garo Hills, Phulbari o Sub-Divisional Police Officer ong·e kamko ka·chengaha. Uni ja·mano ua East Garo Hills, Williamnagar o Additional SP ni kamko jako ra·e ua somoio ong·enggipa SP Davis Nastell R. Marak baksa 2014-2015 bilsio kamko ka·rimangaha. Mishra SP ni kamko skanggipa South Garo Hills, Baghmara-o jako ra·aha jeon ua somoio GNLA bobil dolrang namen Garo Hills o jingjengatmiting somoi ong·a.
Uni Garo Hills o dongmiting somoirango manderangni matnanganirangko chagrongaha, mongsongbate Phulbario manderangko kragija dakani, chatrorangoni dilgipa saksako kal·ake roani aro ukil saksako Baghmarao kragija dakanio bak donggipaba ong·a.
