West Garo Hills Phulbari-o Meghalaya Power Transmission Corporation Limited (MPTCL) nigita 2×50 MVA 132/33 KV Grid Substation ko mijal salni bako chalaie a·bachengnagita a·dokni skotong Minister Conrad Sangma oprake on∙angaha. Ia oprakani somoio Power Minister AT Mondal, PHE Minister Marcuise N. Marak, Tura ni MP Agatha K. Sangma, Sports & Youth Affairs ni Minister Shakliar Warjri aro MPTCL ni adita jako ra·e kam ka·giparang bakko ra·angaha.
Battanggimin bilsirango bijolini voltage komiani a∙sel adita neng·nikanirangko chagronggenchimoba ia substation ko a·bachenge on∙anichi voltage tang·doaniko niknagita man·anggenok ine Conrad Sangma aganangaha.
Una agreba substation ko a·bachengatanichi West Garo Hills a·jani dingtang dingtang biaprango bijolina neng∙nikanirangko olgrokatna man·anggen aro ian a∙dok sorkarini bijolini bidingo dingtanganiko ra∙bagen ine Power Minister AT Mondal-ba aganangaha. Ia project ko North Eastern Region Power System Improvement Project (NERPSIP) ni ning∙o World Bank ni dakchakanichi Phulbari substation ko songnagita man∙aha jean voltage komianiko namdapatna man∙gen aro songdongenggipa manderangna namgniko ra∙baani ong·gen.
NERPSIP ni ning∙o tangka paisarangko bakgni dake chamataha jeon gong 72.55 crore-ko 132 KV Double Circuit Transmission Line, 132/33 KV sub-station aro Bay extension baksa Staff rangna dongchakram biapko rikna chamataha. Bangki tangka gong 33.34 crore ko 33/11 KV sub-stationrang, dongsogimin sub-station rangko taridapna aro 33 KV line ko riknagita chamatskaaha.
Ampati Station oni Phulbari Station ona 132 KV bijoliko sokatenggipa jean 50 km ong·gipaona 50 MVA ko sub-station ni chonchongipa Transformer ona 33/11 KV ni bijoliko suale Bhaitbari, Phulbari, Tikrikilla, Raksamgre, Rongsai, Rajabala-ona bijoliko sokatanio WGH a·ja gimiko 75% nigita chu·sokaha ine parakataha. MPTCL ni rake kam ka∙anichi technology ni a·bao adita chu·sokanirangko nikna man·angan baksana manderangna bijoliko sokataniko nambatatna dakchakanggen. A∙dok sorkarini indakgipa project rangko ra∙baanichi a·doko nambata gadangona ra·baaniko nikna man·angenga ine parakataha.
Apsan somoion Bholarbhita ni J.P. Higher Secondary School-na Indoor Stadium ko riknagita pangchakani ro·ongkoba songe on∙angjolaha. A∙doko kal·susaani a·bao tang·doaniko ra·banagita ia Stadiumko rike on·anggen jenan tangka gong crore 9 chamanaha aro iako ra·bae on·anina Sports Minister ko mittelpile Chief Minister Conrad Sangma aganangaha.
