Da·al salni bako PHE Minister Marcuise Marak baksana PHE department ni Chief Engineer aro adita officialrang Greater Baghmara Water Supply Scheme Phase-1 nigita matchotgimin rika cho·anirangko nirokangaha. Unbaksana Phase-2 ko ra·bana ma·mong sorkarini ra·chakaniko man·agita skotong Minister Conrad Sangma ni dilanichi kamko ka·angenga ine Marak aganangaha.
Ia projectko ka·anichi dam dok songrang jekai Dabigre, Dabigre Songgital, Lotnagar, Akimpal Nokma Colony aro Masighat baksana Baghmara songjinmaba namgnirangko man·anggen. Skanggipa phase ni ning·o sak 6,335 manderangna miksonge ra·baaha aro gnigipa phase o sak 63,335 manderangna miksonge tarinasienga ine Marak aganangaha.
Una agreba a·dokni Jal Jeevan Mission ni bidingoba SGH a·jao tom·e nipiltaianiko dakangaha jeon a·jani DC aro PHE Department ni Chief Engineer bakko ra·angaha. Tom·e nipiltaianiko dakani somoio a·jao kam ka·anio chu·onggijaniko ma·sinagita man·angaha. Indake kam ka·anirang chu·onggijaniko ma·sina man·e miksonggimin kamrangko chu·sokatna man·agita name nirokatchina Chief Engineer aro Addl. Chief Engineer ko Marak ge·etangaha ine parakataha.
Indake kam ka·chakram biaprangona re·e kamrangko nirokachi aro jako ra·enggipa departmentrang baksa tom·e nipiltaianiko dakanian nambate ma·sina dakchaka. Ia nipiltaianirango pangchake bang·a neng·nikanirangoniko naljokatna aro manderangna nambate dangdike on·a chanchisamsonagita mikkangchi man·anggen aro dakchakanggen ine Marak aganangaha.
