Koelarangko chimonge dongipa biapo agitchae dongenggipa lakh 5 metric ton mangni koelarangko ia jani gisepo ta∙raken salangchina Meghalaya High Court ge∙etataha. Chief Justice HS Thangkhiew aro Justice W Diengdoh ni parakatani gitade lakh 5 metric ton mangnigita Coal India ni auction ka∙gimin koelarangko watatna nangkuenga aro ia jani gisepon pilak kamrangko matchotatna nanggen ine janapangaha.
East Jaintia Hills ni Superintendent of Police (SP) ba iani bidingo adita nanggipa kamrangko matchotaha ine parakataha. Una agreba chang 18 gipa interim report ko Advocate General ba Justice Katakey na on∙manaha ine janapangaha.
Gitalbatgipa report rangko man·kujana kingking gital dakgipa ge∙etanirangko on·a man∙kujawa ine Court janapangaha. Iani bidingo re·baenggipa December ni 19 tariko Deputy Commissioner aro gipin jako ra∙e kam ka·giparangoniko Justice Katakey ni 18 gipa interim report o janapatanio pangchake sengenga ine aganangaha. Unbaksana bon·kame Justice BP Katakey ni Single Member Committee oniko 19 gipa interim report ko ua somoio mangmangsan man·soaha ineba Court aganangaha. Indake chuttini sal somoirang sokbaengahani aro Court nigita kamrangko ka·na somoirang bang·jaengahani a·selo jekon Registry dolrangni am·sandie man·gipa report ko sokatchina aro je am·sandie man·anirang donggenchimode changgipino talbatataniko u·iatgen ineba Court parakangaha.
