India a·songni 8 gipa Master Chef ni bon∙kamgipa song·susaanio Manglore songjinmani Mohammad Ashiq skanggipa biapo cheangaha. Unbaksana Nambie Jessica Marak gnigipa biapko man·e India a·songni dal∙batgipa reality show o Meghalaya a·dokni skanggipa bakko ra∙chenggipa ong·e chu∙sokangaha.
Ia bon∙kamgipa song·susaanio sakbri bak ra∙giparangko an∙tangtangni me·subee song·na changgipa bijakko minute 90 ni ning·o song·e matchotchinagita ge·etaha. Marak merong gisimniko bijak song∙e mesokangaha jekon ” Square root” ine bimungko don·aha. Ua saksa West Khasi Hills Upper Rangsa skulni Principal ong·a. Uni achar bading chiwalna miksonganiko Master Chef ni Judge Ranveer Brar una dakchakna ba ra∙donagita ku∙rachakangaha. Marak jean “Tribal Chef” ine bimungko man∙e ia song·susaani a∙bao gnigipa gadangko man·e a·dokna rasongko ra∙baaha.
