Mijal salni bako South Garo Hills aro South West Garo Hills a∙jao Vikshit Bharat Sankalp Yatra ko a∙bachengatangaha. South West Garo Hills Ampatio District Rural Development Agency ni gita ia programko ong∙atangaha jeon a∙jani Deputy Commissioner R P. Marak ni jakchi oprake on∙aniko dakangaha.
Apsan daken South Garo Hills a∙jao tom∙aniko a∙jani District Administration ong∙atangaha. Ia programni bak-o Vikshit Bharat Sankalp Yatra ni bak ong∙e IEC van gari bolsako Malikonaoni re∙ongkataniko dakataha. Ia IEC van rangko jakkale manderangna sorkarini scheme rangni bidingo u∙iataniko dakanggen. South Garo Hills a∙jana bol chet IEC garirangko on∙angaha jekon a∙jao dam bri C&RD block donggiparangna bol gni prak dake tikataha.
A∙songni Prime Minister Narendra Modi ni dilanio, dakchakaniko nangenggipa nokdangrangna dingtang dingtang sorkarini on∙enggipa scheme rangni gimin ma∙siatan baksana scheme ni namgniko a∙dok aro a∙jani manderangna sokatanio rongtal an∙talani, tangka paisa ni gita dakchakani, bijoli, dongchakani nok aro gipin scheme rangni bidingo u∙iatna mangsonge ia programko ra∙baani ong∙enga. Health camp rangko ong∙atanio dingtang dingtang saa ding∙anirangko niani aro sanna bannaniko dakna biming segatanirangchi sak 7,82,000 mang manderang namgniko man∙engaha. Apsan daken Hamara Sankalp Vikshit Bharat campaign a∙songni bang∙a dakchakaniko nanggipa manderangona Gram Panchayat, Nagar Panchayat-o biming segate tangka paisani gita dakchakanirangkoba on∙angenga.
Unbaksana sorkarini scheme rang jekai Ayushman Bharat – PMJAY, PM Garib Kalyan Anna Yojana, Deendayal Antyodaya Yojana, PM Awas Yojana, PM Ujwalla Yojna, PM Vishwakarma, PM Kishan Saman, Kisan Credit Card (KCC), Har Ghar Jal – Jal Jeevan Mission, Jan Dhan Yojana, Suraksha Bima Yojana, Atal Pension Yojana aro gipin scheme rangko ra∙bae sorkari aro a∙songo songdongenggipa mande sakantiko nangrimate dakchakaniko nangenggipa nokdangantiona sokatna ja∙kurangko de∙angenga ine u∙iataha.
