West Garo Hills Gambegre C&RD Blockni ning·o donggipa Chigitchakgre songko Apiculture Mission 2.0 ni ning·o Bee village ba bija jilchakram song ine da·al salni bako Chief Minister Conrad K. Sangma bimingko donangaha. Ia tom·bimonganio West Garo Hills-ni Deputy Commissioner Jagdish Chelani aro gipin sorkarini officialrang dongpae bakko ra·angaha.
Apiculture Mission 2.0 nigita bija jile bija bitchirangko bikotanio dingtang dingtang nanganirang jekai bijarangko jilaniko skie on·ani tangka paisanigita dakchakna, bija jilchakani bakso, bija jilanio jakkalgipa bosturangko donchakna kutturi, skie on·chakna kutturi, bija bitchirangko mesoke palchakani biaprangko ia songna sorkari dakchakanggen ine Conrad Sangma aganangaha.
Una agreba a∙dokni chadamberangko CM Elevate aro YESS Meghalaya programme rangni bidingo agane an∙tangtangna namgnigipa cholko basee ra·rikchina Sangma didiangaha.
Unbaksana Chigitchakgre bija jilchakram songko namdapatna nangchongmotgipa rika cho·anirangko a·bachengatna Chief Minister’s Special Development Fund nigita tangka gong lakh 10 ko on·angaha.
