Assam Goalpara District ni Chotipara songo gnigipa changna A∙chikrangni mongsonggipa maniani dama bol ritchasa ko doke wangalaniko ong∙atgipa namen chu∙sokgipa ong∙aniko nikangna man∙aha. Ia wangala ko Garo Cultural Forum aro Garo Students’ Union (GSU) bakrime Assamo donggipa A∙chikrang jatni dakbewalko ripingna miksonge ong∙atangaha. Ia wangala festival ona hajal hajal manderang A∙chik jatni dokna damna jakkalgipa damarangko doke chrok mesae wangalaniko nina re∙bae bakko ra∙angaha.
Salgnina ong∙atanggipa wangala festival o Assam a·dokni Kamrup aro Goalpara a·jarangoni dol 9 wangalanio bakko ra·angaha. Unbaksana ia bilsio Garo Hills o wangalanio chegipa Gondenggre dolba uamangni chrok mesanio changa sapaniko dakmesoke bakko ra∙angpaaha. Maniani bon∙kamgipa salo Education Minister Rakkam A. Sangma mongsonggipa sokgipa ong·e bakko ra·angaha.
Batanggimin salrango wangalaniko adita biaprangosa dakronganiko niknagita man·ronggenchimoba da·alo ia wangalaniko bang·a biaprangon gamchate ra∙e tangatpilaniko niknagita man∙engaha. Ian A∙chikrangni daka rikaniko a∙gilsak gimikchina giproroatna aro jatni dakbewal rikbewalko gamchatnike ripingna ja∙ku de∙aniba ong∙a ine Sangma aganangaha.
Bon∙kamgipa maniani salo Bajengdobani MLA Pongseng R. Marak, Rabha Hasong Autonomous Council (RHAC) ni Deputy Chief Executive Member Ramakant Rabha, RHAC ni Executive Member Frylin R. Marak aro gipin dal∙dalgipa dilgiprangba bakko ra∙angpaaha.
