Re·baenggipa 2024 Lok Sabha pu·onanio susanagita Shillong aro Tura Parliamentary damgni seat na me·chik dilgiparangni bimingrangko bon·kame seokaniko National People’s Party nigita da·al salni bako NPP ni State President Prestone Tynsong parakataha.
NPP ni National President Conrad Sangma ni ra·chakanichi Shillong ni seat na Ampareen Lyngdoh aro Tura ni seat na Agatha K. Sangma ko dolnigita chu·gimik namnike seokaha ine kobor ra·timgiparangna parakataha. Unbaksana uamangni dol rakbate kamrangko ka·anggenchim ong·ode chenagita ka·dongsoenga ine ua aganangaha.
Una agreba MDA sorkariko rikanio bak ong·enggipa gipin partyrangkoba, re·baenggipa Lok Sabha pu·onanio seokako man·gimin manderangna chakpaaniko on·pachina NPP dol mol·molanikoba dakangaha.
