Shillong songjiinmao 2023 bilsini Cherry Blossom festival ko November 17-19 tarikona ong·atanganio knatobegipa ku∙rangrangchi ring∙e aro doka damanirangko dake an∙saobean baksa tom∙tome matchotangaha. A∙bachengani salo mikkarang wae festivalko dontongatna nanggenchimoba gnigipa aro gittamgipa salo dingtang dingtang biaprangoni bang∙bea manderang re∙bae bak ra∙angnagita man∙aha. Ia maniani bon∙kamgipa salo Cherry Blossom festival-ko chu∙sokatna rakbee kamrangko ka∙anggipa sakantiko a∙dokni Tourism Minister Paul Lyngdoh mittelpilskaani kattarangko aganangaha. Salgnina ong∙atgipa festivalo International Band-rang Hybrid Theory, Neyo aro Snow White gnigipa salo git ring∙dile an∙saodilangaha.
Bon∙kamgipa salo git ring∙anio mingsing minggamgipa Sanam Johar, Boyzone ni Vocalist Ronan Keating, Jonas Blue, Lou Majaw, Blue Temptation, Da Minot, Nokpante, Rhem, Favian, Wanjop Sohkhlet, Banrap, Youngg Nate, DJ Meban, Lamphrang aro Toshan, uamangni dakmesokanichi manderangko an∙saodilangaha. Unbaksana ia festival o a·dokni dingtang dingtang bakrangoni manderang jat tangtangni dakbewal rikbewalo pangchake sol·a repani, ganding chinding aro an·tangtangni changa sapanirangko jakkale bading chiwalna aro bosturangko mesokangnagitaba cholko man·angaha. Indakgipa festival rangko a·doko ong·atanichi a·dokni entrepreneur rangko ra·donagita mingsa chol on·aniba ong·a.
