Khasi aro A·chik ku∙sikko Meghalaya a·dokni mongsonggipa ku∙sik ong∙e ra·gatna dingtang dingtang neng·nikanirangko aro nangnikanirangko nigrike namedake am∙sandianirangko dakenga ine a∙dokni skotong Minister Conrad Sangma Bristibar salo parakataha. Office ni nanganirangko jinmana u∙iatanio ba see rakkianio Khasi ku∙sik ba A∙chik ku∙sikchi segenchimode je manderangan Khasi aro A·chikkuko poraibagijagiparangna neng∙nikaniko on∙gen ine Sangma aganangaha.
Batanggimin changoba indakgipa neng∙nikanirang dongani a∙selo Khasi aro A·chikkuko mongsonggipa ku∙sik ong∙e donagita man∙jaha. Uni gimin ia pilak neng∙nikanirangko mikkangchi man∙janagita Khasi aro A·chikkuko mongsonggipa ku∙sik ong∙e dona skang namedake poraie nianirangko dakna nangenga ine Conrad Sangma kobor ra∙timgiparangna parakangaha.
A∙dokni aro jatni namgnina miksonge kam ka∙gipa sorkari ong∙ani gimin Khasi aro A∙chik jatgnini ku∙sikko a∙dokni ku∙sik ine donako nangnikgipa ong∙a. Indake ong∙genchimoba songdongenggipa sakantini namgnina chanchie iako ra∙gatna skang name am∙sandianiko dakangenga ine Sangma agandapangaha.
