November 11 tariko skanggipa changna Krimkro Music festival ong∙atanggipao sak hajal 30 na bate doka damaniko aro ring∙salaniko knatimna namnikgipa manderang re∙batoke namen chu∙sokgipa ong∙angaha. Ia festival o bang∙a jatni doka damani ostrorangko jakkalgiparang aro gipin ring∙salanirangko dakgipa dolrang re∙bae bak ra∙e dingtang dingtang manderangni namnikagita rokkom anti gitrangko ring∙e dakmesokaniko nikangna man∙aha.
Ia salo Resubelpara Rongdiping Socio-Cultural Club A∙chik jatni ostrorangko jakkale knatobee kal∙e mesokangaha aro MOA ni nambee jatni gitrangko knatobee doka damanichi manderangko namen an∙saoataha. Bak ra∙giparangni dakmesokanirangchi jatni dingtanganikosan mesokaigija, ia festivalko ong∙atanichi jatni doka damaniko ripingna on∙kanganikoba mesoka.
A∙chik Theatre Tura, a∙ja antio ong∙enggipa obostarang jekai pekgipa bosturangko jakkale manderangni janggi tangani nosto ong∙engani gimin golporango pangchake dakmesokangaha. Uamangni dakmesokaniko nike songsalo ong∙enggipa obostarangko manderangna nipiltaichina bilakgipa didiataniko on∙angaha.
Ia festivalni chu∙sokgipa ong∙anina dakchakanina Nokpante Production dingtang mancha Tourism departmentni Assistant Director B. S. Marak aro Meghalaya Tourism ni pilak officialrangko mittelangaha. Ia festival ko skanggipa changna ong∙atanio chu∙sokgipa ong∙aniara uamangni chanchiana baten namgipa ong∙aha ine Mikhail Marak aganangaha. Ia festivalko ong∙atanichi doka damaniko aro ring∙salanikosan maniaigija jatni dakarika aro dingtanganiko manianiba ong∙a ine Marak parakangaha.
