Chang 47 gipa 100 Drums Wangala Festival 2023 ko West Garo Hills ni Jengjal Baljek Airport o da·al saloni a·bachengataha. Wangala maniani skanggipa salni tom·aniona HDWFC ni Chairman, Ronald Rikman Sangma sokbagipa pilakon ka·dimeani aro kusini kattarangchi rimchaksoaha.
Salgittamna ong·atenggipa ia Wangala manianiko GHADC ni CEM Albinush R. Marak mongsonggipa sokgipa ong·e oprake on·angaha.
A·chikrangni dal·begipa mingsakamkam maniani bidingo aganangengon GHADC CEM jatni dakbewal, rikbewal aro ganding chindingrangko ripingna nangani gamchataniko aganangaha. Mikkangchi Wangalako ong·atna GHADC ni gita bil ama dipet dakchakangen ineba Marak agandapangaha.
Wangala festivalni skanggipa salo Tura Government College aro Assam Garo Cultural Forum ni chroke dakmesokaniko nikangna man·aha.
Una agreba Handloom aro Handicraft exhibition rangko ong·atan baksana jatni kal·anirangkoba dakatenga.
