Mijal salni bako Shillong Courtyard Marriott o Chief Minister Conrad Sangma unbaksa Health Minister Dr. Ampareen Lyngdoh aro World Health Organization Dr. Roderico H Ofrin ni dongpaanio North East TB-Free Summit ko oprake on·angaha. Chief Minister uni agananio sanna bannaniko namdapatanian sorkarini mongsonggipa dakna nanggipa kam ong·a ine parakangaha. Re·anggipa salrango sorkari sanna bannani a·bako namdapatna korosrang ka·e dingtang dingtang cholrangchi jotton ka·angaha. Iasan ong·aigija sorkarini dakchakanichi nambatgipa sanna bannaniko songsalo on·a health mission aro wellness centre rangko ra·baaha ine Sangma agandapangaha.
Meghalaya a∙doko TB sabisiko bon∙atna kam ka∙anio sanna bannaniko dakna diltugipa songrango sanchakram biaprangko rike on∙a nanganirang bang∙en donga. Unbaksana songni manderangko TB sabisini gimin u∙iataniko aro skie on∙anirangkoba dakanggen ine Conrad Sangma parakangaha. Ia kamko ka∙na gita songko nokko dilgiparang aro sam bolko jakkale sanna bannaniko dakenggipa dolrangko dakchakatna miksongenga ine ua agandapangaha.
Ia somoio Chief Minister, Meghalaya Mobile Portable AI-based X-ray ko a·bachengate on·angjolaha. Ia tom·aniona ma∙mong sorkarioni Dr. Rajendra P Joshi NEIGHRIMS ni Director Dr. Nalin Mehta, Nagaland aro Manipur a∙dokni Secretary aro salgro-salaram a·dokni gipin dilgiparang dongpae bakko ra·angaha. Ia tom∙bimonganiko World Health Organization (WHO) baksa a∙doko sanna bannaniko dakenggipa Health department ong∙atangaha.
