Re·baenggipa 2024 bilsio Lok Sabha pu·onanio Shillong aro Turani biapo BJP chena ka∙dongsoaniko BJP dolni dilgipa A L Hek parakangaha. MDA sorkari baksa bakrime kam ka·enggipa dol gimikan susanasiengani gimin, re·baenggipa electiono pu·ongipa manderangko nigrike BJP dolna chakpagipa adita manderang donganiko nike Tura aro Shillong ni biapo BJP dol chegipa ong·na niksamsoani donga ine Hek parakangaha.
BJP dol ma·mong sorkariko chalaienggipa ong·ani gimin re·baenggipa Lok Sabha pu·onanio chegipa ong·nagita rakbate kamko ka·anggen ine ua parakangaha.
Shillongni biapo ua susaaniko dakanggenma ine sing·on, susaaniko seokna angni jako ong·ja indiba party ko dilenggipa dilgiparangni jakosa ong·gen ine Hek aganangaha. Unbaksana Shillong ni biapo BJP dolo susanasienggipa sakgittam manderang donga ine batanggimin chango adokni BJP President Rikkman G. Momin aganmanaha ineba ua u∙iatangaha.
