Ri-Bhoi a∙jani Umroi constituency ni ning-o dongenggipa Mawkyrdep song, a∙doko nambatgipa Village panchayat ine, chi-ko ripingani aro simsake rakkiani bidingo a∙song gimiko gittam gipa biap ko man∙aha.
Ia boksisrangko 4 gipa National Water Awards ni gita, New Delhi ni Vigyan Bhawan Plenary Hall-o, a∙dokni Vice President Jagdeep Dhankar mijal salni bako sualaniko dakangaha.
Skanggipa ‘Best Village Panchayat Award’ ko Telangana-ni Bhadraddri Kothagudem a∙ja ni Jagannadhapuram songni panchayat, gni gipao, Tamil Nadu ni Karur a∙jani Kadavur song ni panchayat aro Kerela ni Thiruvanathapuram a∙jani Manickal songni panchayat, boksis ko man∙angaha aro gittamgipao Meghalaya oni Ri-Bhoi a∙jaoni Mawkyrdep songni panchayat man∙angskaaha.
Department of Water Resources, River Development aro Ganga Rejuvenation-ni Jal Shakti ni Ministry, ia 4 gipa National Water Awards, 2022 o ming chi∙sa dingtang dingtang bakrango, gimik sak 41 chegiparang donga ine parakataha.
A∙doko ong∙atenggipa chi-na simsakani programko ma∙mong sorkarini niksamsoe dakdilenggipa, ‘Jal Samridh Bharat’ ba ‘ Water Prosperous India’ ni giminba talate on∙angaha. National Water Awards ko 2018 bilsio, chi-ni gamchataniko manderangna u∙iatna aro uko ripingna miksonge a∙bachengataha. Gnigipa aro gittamgipa National Water Awards jekon 2019 aro 2020 o Covid sajinma ni a∙sel on∙angna man∙jahachim, uarangkoba ia programme-o suale on∙angjolaha ine parakataha.
