Deputy Chief Minister Prestone Tynsong ko Meghalaya a·dokni National People’s Party (NPP) dolni gitalgipa President ni kamko jako ra·e ka·na da·al salni bako seokangaha. Gitcham President Dr. W R Kharlukhi bilsi 16 mangna party ni dilgipa Pa P A Sangma sagini ripeng ong·e dolna dangdike on·baaha. Uni namgipa kamna aro ka·kimchae party na on·kange dangdike on·anina da·alo Shillong party officeo Conrad Sangma aro gipin dilgiparang mittelplaniko dakangaha.
Prestone Tynsong ni Meghalaya a·dokko re·dilani namgipa gunko nike da·alo party ko dilna President ni kamko Dr. W R Kharlukhi ni ja·man pakwatangskaaha. President ni kamko jako ra·e a·dokko aro North East o NPP ko niksengate re∙dilanio chu∙sokgipa ong∙china nama skanikoba on∙angaha. Tynsongna ia kamko pakwatangan somoio party ni gipin dilgiparang jekai Deputy Speaker Timothy D. Shira, NPP ni National General Secretary James Sangma aro gipin dilgiparangba bakko ra·angtokaha.
