Sanna bannani bidingo namdapaniko ra·banagita chasong gitalni technology rangko jakkale nambatatna a·dokni skotong Minister Conrad Sangma Securra Health dol baksa Chennai songjinmao da·al salni bako tom·e chanchirimaniko dakangaha.
Ia tom·anio a·doko songdongenggipa manderangko sanna bannani bidingo see rakkie nirok simsakaniko dakna, sae ding·e dongenggiparangko ning·tubate ma·sinagita Predictability Model ko jakkale, ru·ute sae dongenggipa aro sasimsimgiparangko nirokna, ku·silitinggita sanna bannaniko dakna agantalate on·an baksa namgipa sanchakram biaprangko a·bachengatna chanchirimangaha.
A·doko sae ding·e dongenggiparangko see rakkigiminrangko nie, a·dok sorkari sanna bannani a·bao nanggnirangko u·isamsoe kamko ka·na man·agita nanggipa rika cho·anirangko a·bachengna ja·ku de·na man·gen ine Sangma parakataha.
