Da∙al salni bako North Garo Hills a∙jao Election Commission ni niamo pangchake a∙songni aro a∙dokni ra∙chakgimin political dolrangna 2024 bilsini Draft Photo Electoral Roll ko a∙jani Deputy Commissioner ni conference chamber-o on∙anganiko dakangaha. Uarangko Election Department ni Additional Deputy Commissioner ong∙enggipa Kapil Koch, AERO, Verdi Sangma aro Liam T G. Momin ni jakchi on∙angaha. A∙jao badita sak manderang pu∙onaniko dakna gita man∙enga iako janapengon, chu∙gimik sak 1,37,057 manderang dambri constituency rangoni chong·motan Kharkutta, Resubelpara, Mendipathar aro Bajengdoba ko ra·e pu∙onna gita man∙aha.
ID o maiba sechanganirang dongenchimode uko tik ka·nagita October 27 oni December 9 tarikona man·gen ine parakataha. Re∙baenggipa November 11 oni 18 tarikona SVEEP programko ong∙ate dingtangmancha pu∙ona bil man∙gipa sakantina, Electoral Roll-o biming segatani namgni aro pu∙onanina jak on∙paani bidingo talatanirangko dakangna mangsongangenga ine ADC Kapil Koch u∙iataniko on∙angaha.
