Garo Hills ni bakrango rama jal·angrangko rika cho·ani kamrangko name ka·jaengani a·sel ta·raken nosto ong·enga ine Niksamso Garo Community Organisation (NGCO) dolni gita u·iataniko dakangaha. Rama jal·angrangko rika cho·anio algatra ba bitumenrango chirangko brine tarianichi chonchongipa ro·ongrang rake ma·sikapna man·jani gimin ta·raken nosto ong·enga ine janapangaha.
Unbaksana jako ra·e kamko ka·enggipa contractor-rang, sub contractrangna on·taie kam ka·anio nirokgijani a·sel aro ia kamko ka·na name changgijagiparangko rime kamko ka·atan baksana department-nigita maming nirokani dongjani a∙sel an∙tangtangni skagita kam ka·enga ine songdongenggipa manderangni matnange agananiko knasona man·aha. Indakgipa koborrangko man·soe NGCO dolrang re·ange nieanio mikrontangchi niknagita man·aha aro iani a·selsa PMGSY ni rama jal·angrangba namjaenga ine NGCO dol janapataha.
