South West Zone Ampati ni bakrimgimin NGO dolrang jekai GSU, NGCO aro AHAM, re·anggipa October 17 tariko LDA ni kamna nakatgipa sakchikkung manderangni bimingrangko den·gale gital dake porikkako ong·ataie seokaniko dakchina mol·mole District Selection Committee ni Chairman aro SWGH ni DC R. P. Marak na chitti sedoangaha. Ia bimungrangko nakatatani dongimin niamrangko aro 2023 June 14 tarikni Office Memorandum o pangchake sorkarini ge·etgiminko pe·ani ong·a ine uamang parakangaha. Sorkarini ge·etanigitade kamrangna seokengon a·jao songdongkamgipa manderangnasa on·a nanga ine janapa gnang aganangaha.
Jat gittamna sualgipa sotchet percent oniko Garo Hills na tikatgipa bakko A·chikrang man·a nanga. Da·ogita niamko ja·rikgija kamna bimungrangko seokaniara dongimin niamko jarikgijani ong·a aro South West Garo Hills o donggipa chadamberangni man·gniko ru·siata ine uamang parakangaha.
Indake dakanichi kakket ong·e kam ka·aniko aro apsan suale on·aniko nichangani ong·an baksana jotton ka·enggipa chadamberangna bebe ra·na amgijaniko on·a ine jegalenggipa dolrang parakataha. A·jani Manderangna apsangrik cholko on·a aro manderangna ka·donganiko on·pilna ia bimingrangko den·galani namgipa ja·ku de·ani ong·gen ine uamang janapangaha. Uamangni mol·molaniko knachakja ong·ode nanggipa niamrangko ja·rike kakket bichalko man·agita sing·doanggen ine parakangaha. Ia kamko jako ra·enggiparang aro bak donggipa manderangko uamangni mol·molaniko knachakpachina dingtangmancha Chairman na chittio janapangaha.
