Meghalaya a·doko Jal Jeevan Mission (JJM) nigita lakh 4 mangna batpile nokantiona ringani chiko sale on·anio chu·sokaniko skotong Minister Conrad Sangma parakataha. JJM dolni dingtang dingtang a·jarango nokantiona ringani chiko sale on·ani da·ona kingking chu·gimik 61.52% ong·aha ine Sangma parakataha.
Re·baenggipa salrango Functional Household Tap Connection (FHTC) ba nokdangantio chiko jakkalna siltongrangko sale on·gipa chu·gimik 100% ong·e matchote kamrangko ka·angkuna Sangma didianikoba on·angjolaha.
Unbaksana ia bilsini December jani gisepo lakh 5 nokdangrangna ringani chiko sokate chu·sokatna kamko ka·enga ine Public Health Engineering (PHE) ni Minister Marcuise N. Marak parakataha. Sorkari chu·gimik lakh 6 nokdangrangna chiko sokatna nisanko done kam ka·enga ineba Marak aganangaha. Meghalaya a·dokna JJM ni ning·o 6000 crore chamaoniko 3000 crore tangka paisarangko man·soe kamrangko ka·enga ineba Marak janapangaha.
