All Mrong Chra Association-ni Chang 3 gipa Annual General Meetingko October 23 tarik Sombar salo Rongkhon Songgital Turao Jolien Mrong-ni noko ong·atangaha.
Ia tom·anio Chra Association-ni mongsonggipa kamrangni gimin chanchirime uamangni dongimin katta ja·pang “MA·NA-NONO KRIMKO WARACHAKNA” o pangchake nipiltaianiko dakangaha. “Ma·ni-noni nokdango kam a·selo ma·na-nona kamko ka·na sippi gita danil gita warachakna ma·ni-noni nokdangko tarina, pagitcham ma·gitchamrangni namgipa dakbewal rikbewal aro aganbewalrangko chasongna ripingna kadena, chasong gitalni Chra depanterangna skie on·na, Jedake; Mande sia bon·ao, Nokchame angsare kaao, Mela saldongao, Gru me·mango, maikai Chra depante-gita ma·na-nona kam ka·genchim uarangni gimin skie on·na aro skie ra·na, Dingtang-dingtang biapo donggipa Mrong Chra depanterangko apsan bakrimaniona rimbana kamko ka·na, Mrong Paa gaachirang baksa ku·monge mahari ma·drangko rikna kamko ka·na” Mrong maharirangni mongsonggipa ka·gni kamrang ong·a ine u·iatangaha.
Unbaksana ia tom·anio Mrong Chra Association-ni 2024 bilsini Calender ko aro T-Shirtkoba Presidentni jakchi oprake on·angjolaha. Una agreba Mrong Chra Association-ni Executive na dongimin somoi bon·ahani gimin gital Executive body ko seokanikoba dakangaha. Tura Wadanang oni Rodrik Mrong ko Presidentna, Vice President na Jame Mrong aro Ampati ni Shanding Mrong, General Secretary na Jenggitchakgreoni Luckingbirth Mrong, Asstt. General Secretary na Reuben Carlosh Mrong aro Braver Mrong, Accountant na Kerinson Mrong, Publicity Secretaryna Jabath Mrong, Environment Secretary na Rojillar Mrong, Games & Sports Secretaryna Rimma Mrong, Organising Secretary na Sakseng Mrong, Bibinson Mrong, Danseng Mrong aro Sengnath Mrong, Adviser na Ajay Mrong aro Chief Adviserna Bithson Mrongko seokangaha. Gipin Executive Member rang Saljagring Mrong, Rupa Mrong, Roston Mrong, Silseng Mrong, Sangban Mrong, Jolien Mrong, Meghlet Mrong, Elgin Mrong, Jaseng Mrong, Hilbath Mrong, Greatush Mrong ko jinma namnike donangskaaha.
Ia seokgimin Executive body-na dongimin somoiara 2023-2026 bilsiona ong·gen ineba tom·anio tik ka·e donangaha. Bon·kame Dadenggre Constituency-ni MLA Rupa Mrong Chra Association-o bakrimgipa sakantiko mittelangan baksa ku·pattianirangkoba on·angaha.
