Meghalaya a·dokni aro A∙chikrangoni saksa Master Chef of India 2023 o bak ra∙enggipa Nambie Jessica Marak nambatgipa sak 12 ni gadangona sokdoaha.
Ua saksa cha∙ani tarina aro bijak song∙na gisik nanggipa ong∙e Madras o poraiengmiting somoio noktangni aro biaptangni cha∙anirangko gisik ra∙e “Eat Your Kappa” YouTube channel ko kulie bijak song∙anirangko manderangna mesokangaha. Uni dingtang mancha biaptangni cha∙anini gamchataniko u∙ie ka∙oksianichi aro gisiko nanganichi da∙alo ua song·a channani a·bao saksa niksenggipa ong∙aha aro cha∙ani tarisusagipa Master Chef of India o bakko ra·e da·o chi·gnigipa gadangona sokdoe jatna ra·songko ra·baaha.
Master Chef India ko Sony TV channel o mesokenga jeon Nambie Marak an·tangni ia gadangona sokdoange chu·sokanina Northeast a·jani saksa song·gipa changipa ong·anina rasong chaaniko koborna parakataha.
