Meghalaya sorkarini Directorate of Sports and Youth Affairs-ni gita October 16 oni 21 tarikona NEHU campus Shillong o ong·atgipa State Level Youth Exchange Programme-o Williamnagar Government College-ni chatro chatrirang adita susaanirango chegipa ong·baaha.
Uamang jatni chrok mesaani, dakmesokani, dotdrong dokani, bangsi sikani, sing∙anirangna aganchakani, lekka bichitko kole aganani aro noksarangko sale rong nonganioba bako ra·angaha. Uamang jatni chrokmesaani jekai Wangala chrokanio skanggipa biapko man·e chegipa ong·baaha. Lindrid D. Shira ni segipa School Master-ni gimin dakmesokanioba gnigipa biapko man·e chegipa ong∙baaha. Unbaksana Pringstone C. Marak bangsi sike mesokanio aro Sallim Sangma dotdrong doke mesokanio sakgnian gnigipani biapko man∙e chegipa ong∙baskaaha.
Re·baenggipa 2024 bilsini January jao ong·atnasienggipa National Level Youth Exchange Programme-o uamang bako ra·anggen. Uamangni ia chu∙sokanirangna a∙jani Deputy Commissioner nama skaniko uamangna on∙angaha.
