Sorkariko rikanio Bharatiya Janata Party (BJP) dolna agre gipin Political dolrang baksa kam ka∙rimna gita maming neng·nikani dongja ine Meghalaya Pradesh Congress Committee (MPCC) ni dilgipa Vincent H Pala, Khasi Hills Autonomous District Council (KHADC) ko sorkari rikanio Congress dolni chakpaaniko on∙anina sing∙doani gimin aganchakangaha.
National People’s Party (NPP) ni chalaienggipa KHADC ni Executive Committee (EC) ko chakpaani miksonganiara Sixth Schedule o jatni dongimin niam retiko ripingna aro namdapatna miksonge re∙mikanganio jak on∙pana cholko man∙ani ong∙a ine Pala janapangaha. Una agreba NPP chi chalaienggipa KHADC ni EC ko rikanio dakchakna gita ma∙mongni dilgiparang baksa golpogrikchengesa chakpaaniko on∙aha ineba Pala janapangaha.
Unbaksana re·baenggipa bilsio Lok Sabha aro MDC pu·onanio susanagita Congress dol tarisamsoengaha ine Pala parakataha. Re∙baenggipa KHADC aro JHADC pu·onanio susanagipa manderangko seokna block ge∙antionan ta∙rake kamrangko ka∙na u∙iatmanaha. Ia kamko November jaoni a·bachengatna man·chigiminko ia jani 23 tarikonin a·bachengatna tik ka·angskaaha aro pu·onanio susanasienggipa bimungrangko December jao parakatgen ine Pala aganangaha.
Da∙o ong∙enggipa Congress doloni MDC gipin dolrang baksa bakrimna miksonganirang donganiko sing∙anina Pala, politics ni a∙bao je mandeba an∙tangtangni namnikgipa dolko baseanio champengani dongja indiba adita Khasi-Jaintia a∙jarangoni aro Garo Hills ni dilgiparangba Congress dol baksa bakrimna skaniko parakatgiparang bang∙en donga ine janape aganangskaaha. MDC pu·onanio Congress doloni susanasigipa manderangko seokna block onin chu∙gimik bil donga ineba ua janapangaha.
