Re·baenggipa Lok Sabha election o Shillong aro Tura ge·gni seat rango susaanio chenagita ka·dongsoenga ine AICC ni General Secretary aro Meghalaya ni in-charge Manish Chatrath da·al salni bako koborna parakataha. Manish a·doko chena ka·donganiko parakatan baksana a·dokni manderangna ku·chakgimin kamrangko chu·sokatna man·jaenga ine NPP chi chalaienggipa sorkariko matnange aganangaha.
Da·alonaba MPCC dolko Vincent Pala ni dilanichi namroroaniko niknagita man·enga aro a·dokni ge·gni seat ko man·a namen kadongsoenga ine Chatrath aganaha. Ia bilsioba NPP sorkari riktaiaonin bang·a dingtanganirangko u·inagita man·aha aro batanggimin bilsi 5 oba ku·chakgimin kamrangko bang·gijasan chu·sokatangaha jekon manderang da·o ka·sine ma·sibaengaha ine Chatrath aganangaha.
Khasi Hills aro Garo Hills ni damgni Lok Sabha seatna saksakosan ong·aigija adita namnamgipa dilgiparangko chu·gimik tarisamsoanirangko dakmanaha ine Chatrath parakataha. Susanagita kragipa manderang bang·genchimoba Delhi o screening committee seokaniko dakani ja·mano Central election committee je mandean chenagita cholrang bang·batgipako nigrikesa bon·kame seokaniko dakanggen ine Chatrath agandapangaha.
